ក្មេងប្រុសអាយុទើបតែ ៣ខួប លង់ទឹកប្រឡាយស្លាប់ ពេលម្តាយកំពុងជជែកគ្នាលេង
01-July-2016 | ដោយ មែន កំសត់
ពោធិ៍សាត់ ៖ ក្មេងម្នាក់លង់ទឹកប្រឡាយស្លាប់ ខណៈម្តាយកំពុងជជែកគ្នាលេងក្រោមផ្ទះ ភ្លេចគិតកូន បង្កឱ្យមានការភ្ញាក់ផ្អើលកាល ពីវេលាម៉ោង២៖៣០នាទីល្ងាច ថ្ងៃទី ៣០ ខែ មិថុនា ឆ្នាំ ២០១៦ នៅចំណុចប្រឡាយ ស្ថិតក្នុងភូមិម៉ាន់ចែ សង្កាត់ព្រៃញី ក្រុងពោធិ៍សាត់ ខេត្តពោធិ៍សាត់ ។
លោក ឈន រិទ្ធិ អធិការនគរបាលក្រុងពោធិ៍សាត់ បានប្រាប់ ឱ្យដឹងព្រឹកនេះថា ក្មេងរងគ្រោះដែលលង់ទឹកស្លាប់ មានឈ្មោះ ឡេង សៀវ ភេទប្រុស អាយុ ០៣ខួប មានឱពុកឈ្មោះ ឡាញ់ ចាន់ឡា អាយុ ៣២ឆ្នាំ និង ម្តាយឈ្មោះ ឈន ប្រឹម អាយុ ២៦ឆ្នាំ រស់នៅភូមិសង្កាត់កើតហេតុខាងលើ ។
លោកអធិការបានឲ្យដឹងទៀតថា មុនពេលកើតហេតុ ម្តាយក្មេងរងគ្រោះ បាននាំកូនទៅលេងផ្ទះរបស់ឈ្មោះ ពុទ្ធ សុគន្ធារិទ្ធ នៅភូមិជាមួយគ្នា លុះទៅដល់ក៏បានអង្គុយជជែកគ្នាលេងនៅក្រោមផ្ទះ ហើយក្មេងរងគ្រោះក៏បានរត់លេងនៅក្បែរនោះដែរ ។ ស្រាប់តែមួយសន្ទុះក្រោយមករកមើលកូនមិនឃើញ ក៏ដើររកកូនស្រាប់តែប្រទះឃើញអណ្តែតនៅក្នុងប្រឡាយទឹក នាំគ្នាផ្អើតឆោឡោចុះស្រង់ជួយសង្គ្រោះ ។ លោកអធិការបានបន្តថា ដោយម្តាយក្មេងរងគ្រោះមិនអស់ចិត្ត ក៏បញ្ជូនកូនរបស់ខ្លួនទៅសង្គ្រោះនៅមន្ទីរពេទ្យបង្អែកពោធិ៍សាត់ តែជាអកុសលពេទ្យបានបញ្ជាក់ថា ក្មេងនោះបានដាច់ខ្យល់ស្លាប់បាត់ទៅហើយ ។
ក្រោយពេលកើតហេតុសពក្មេងរងគ្រោះ ត្រូវបានក្រុមគ្រួសារយកទៅធ្វើបុណ្យតាមប្រពៃណីនៅគេហដ្ឋាន ។ដំណឹងនេះបានទៅដល់ ឯកឧត្តម ម៉ៅ ធនិន អភិបាលខេត្ត បានចាត់ឲ្យលោក ចាប នាង អភិបាលក្រុងពោធិ៍សាត់ ចូលរួមរំលែកទុក្ខដល់គ្រួសារសព និង បានផ្តល់នូវអង្ករ ៤០គីឡូក្រាម មី ២កេស ទឹកស៊ីអ៊ីវ ២យួរ និង ថវិកា ១០ម៉ឺនរៀល សម្រាប់ចាត់ចែងធ្វើបុណ្យទៅតាមប្រពៃណី ។
ចំនួនអ្នកទស្សនា
- ថ្ងៃនេះ10071
- ម្សិលមិញ14181
- សប្តាហ៍នេះ10071
- ខែនេះ125221
- ឆ្នាំនេះ125221
- សរុប20567677